How to apply concealer & corrector - كيفية وضع الكونسيلير و الكوركتر

السلام عليكم ورحمة الله وبركاته

تدوينة اليوم حتكون عن طريقة  رضع الكونسيلرإخفاء الهالات الداكنه .. طبعن أنا عملت التدوينة دي لإني شايفه أغلب البنات بيعانو من الهالات الداكنه ولمن بيحطو الكونسيلر مابتغطيلهم الهالات .. أنا هالاتي خفيفه بس أحيانا أحتاج تغطية عاليه إزا عندي مناسبه كبيره وحوريكم طريقتي والأشياء اللي أستعملها ..

بعد الترطيب والفاونديشين أستنى 5 دقايق  وأول شي استعمل الكوركتر اللي هوا المصحح  .. الكوركتر الأورنج ( البرتقالي ) مره مهم عشان يكنسل اللون الغامق .. في ماركات كتيرة توفر الكوركتر الأورنج زي ميك اب فور إيفير وماك, ومو شرط يكون عندك كوركتر يعني لو عندك روج أورنج أو بلشر كريمي أورنج حيعطي نفس النتيجة, أنا ماعندي كوركتر وأستعمل روج أورنج من إيستيه لودر  رقمو (60 sunset coral ) ماعجبني بس فادني كـ كوركتر, أحط منو مره خفيف ع الهالات و أوزعو بالطبطبة باصباعي على الهالات  اسفل العين من الزاويا الخارجيه الين الداخليه للعين 

تاني شي بعد ماوزعت الكوركتر أخد كونسيلر بنفس درجة لوني وأوزعها بالفرشه على الهالات فوق الكوركتر, لفوق الكوركتر أفضل الكونسيلر الكريمي على السايل  ( ااستعمل السايل للميك اب اليومي زي fit me  من ميبيلين ) لإنو تغطيتو أقوى هنا انا استعمل Boiing من بنفت مره ممتاز وتغطيتو متوسطة وينفع يومي, في كونسيلرات تعطي تغطية عالية زي full cover concealer من ميك اب فور إيفير إزا حبيتو تعرفو, بالنسبة ل Erase paste من بنفت حلو للي هالاتهم خفيفه ويبو تغطية طبيعيه دا يختلف عن  Boiin إنو فيه نسبة ترطيب والأندرتون تبعو بيتشي ( مشمشي ) فحيقلل من الهالات وينور المنطقة ف نفس الوقت. , ودي صورة توضيح لوضع الكونسيلر 

تالت شي ( إختياري ) قلم الهايلايتر عشان ينور تحت العين, أحطو على شكل مثلث  أو خطوط تحت منطقة الهالات مايكون على الهالات ولا قريب من العين زي اللي في الصورة أسفل

و إن حبيتو تعملو دي الخطوة حاولو تدمجو الهايلايتر على نفس منطقة  المثلث وماتطلعو بيه فوق الين حدود العين وكملو دمج الهايلاتر نزولا لطرف الخشم وأعلى الخد وأسحبو منو على برا باتجاه الزاوية الخارجة للعين ( إن شاء الله تكون وصلت المعلومة هههه )

آخر خطوة التثبيت .. تثبيت الكونسيلر مهم عشان مايخطط ولا يتكتل  وأنا استعمل بودرة les beiges  درجة (N 10 ) من شانيل عشان أثبت الكونسيلر وتنورلي منطقة أسفل العين, ممكن كمان تثبتو بلوس باودر عاديه أو بودرة  مضغوطة خفيفه وكثيرين يستعملو بودرة البن ناي بانانا وتلاقوها عند التاجرات

وبس الحمد لله دي كانت طريقتي في إخفاء الهالات وإن شاء الله تكونو استفدتو ..

Empty Products Review - ريفيو عن منتجات خلصتها

السلام عليكم ورحمة الله وبركاته

تدوينة اليوم حتكون منتجات خلصتها وحعطي رأيي فيها وإزا برجع أشتريها ولا لا ..

نبدأ مع مقشرات الجسم ..

The Body Shop Spa Wisdom Africue

أملاح مقشرة للجسم من بودي شوب, تجربتي معاه كانت مره جميله وحرجع أكررها, الذرات مره صغيرة وناعمة ع الجلد  وريحتها  ريحة نضافه (نظافة) ويقشر من قلب ويشيل كل الدهون والرواسب والبكتريا اللي ع الجسم وفي نفس الوقت يرطب الجسم , أنا غالبا يتحسس جلدي من مقشرات الأملاح بس دا مره غير حتى كنت بستعملو لكل جسمي من غير ماحس بتحرقان أو تهيج أو حكة, أفتكر لمن أخدتو الموظفة بتقولي إنو مع الإستخدام المستمر يفتح بس أنا ماحسيت إنو يفتح أو شي من كدا .. لكن بالرغم من كدا أعتبرو ممتاز ويستاهل التجربة

سعرو: في حدود 110 من محلات ذا بودي شوب

Soap And Glory Flake Away Scrub

مقشر جسم من سوب أند قلوري, دا الحجم الصغير جا مع طقم, المقشر جميل من ناحية التقشير ويرطب وريحتو كمان حلوه بس اللي ماعجبني إنو ريحتو عطريه بزيادة فما كنت بستعملو على كل جسمي زي مثلن مافوق الصدر والرقبه لإنو أخاف يسببلي حساسية وإحمرار مره جربتو على ضهري وحرقني وسببلي هيجان لكن  كنت بستعملو على السيقان والأذرع والركب والأكواع وكان تقشيرو كويس ,كمان المقشر خشن شوية وممكن مع قوة الفرك يجرح ودا كمان اللي ماحبيتو .. عموما سوب أند قلوري عندها أنواع تانيه من مقشرات الجسم ودا مايمنع إني أجرب مقشرات تانيه من عندهم لكن ماتوقع إني حرجع أشتريه

سعرو: للحجم الصغير 20 ريال والحجم الكبير 80 ريال .. سوب أند قلوري تلاقوها في صيدلية بوتس جدة التحلية + الصيرفي 

Pounds Clear Balance ( Smooth Pores )

غسول الوجه من بوندز لشد المسامات, الغسول مره ممتاز لشد المسامات وحلو استعمالو في الصباح و قبل الميك اب, تنضيفو مهو عميق بس يشيل الدهون والرواسب اللي ع الوجه ويشد الوجه ويضيق المسام ويصقل سطح الوجه ويهيء البشرة للميك اب, في أنواع تانية لغسولات بوندس كلير بالنس غير دا النوع, انا ناسبني وعجبني كغسول خفيف وحرجع أشتريه

سعرو: في حدود 19 من الصيدليات والسوبرماركت

Shizens Silky Renewal Gel

دا جل منقي للبشرة من ماركة شيزينز هيا شركة ماليزيه زي ماقرأت إنو الجل فيه بكتريا اسمها  Bifidobacterium Bifidum) ) ودي بكتريا جيده وموجوده في جسم الإنسان وفي حليب الأم, طبعن وظيفة البكتريا إنها تخفف من الإلتهابات ويجدد عملية بناء البشرة.

نجي دحين لرأيي, أول شي أنا جبتو زمان من ماليزيا من تايم سكوير ومحتفظه بيه على أمل أجيب منو كميات لإنو من جد رهيييييب, فكرتو انك تبللي وجهك بالمويه شويه وتحطي كمية بسيطة على يدك وتفركي بيه كل الوجه بعدها نفس الجل يبدا يتكور وتسير زي الحبيبات ولونها يتغير بني دا يعني إنو بيشيل كل الأوساخ والدهون إلي على سطح البشرة واللي جوت المسام, بعد ما أشطف وجهي أحس بإنتعاش و نعومة ومايترك أثر للدهون ووفي نفس الوقت فكرتها ممتعه ومره عجبتني نتيجتو وأكيد حرجع أشتري منو إن شاء الله

سعرو : ب68 رنجت مايعادل 80 ريال تقريبا

Bioderma Sebium Pore Refiner

من بيوديرما مصحح للمسام يضيقها ويخفف منها, إممم أول كنت أحسبو معالج للمسام وكنت أحط منو في الليل قبل ماأنام هههه بعدين قرأت عنو وعرفت إنو مجرد مصحح ينحط قبل الميك أب, حسيت إنو شوية يشد المسام ويأخر إفرازات الدهون لكن مو مرة عجبني بس إزا وحده محتاجة مصحح للمسام خفيف للصباح ممكن دا يعجبها ( أنا ماحب أحط أشياء زي كدا الصباح مكتفية بالبورفيشنال من بنيفت لميك أب السهرات والعزايم بس ), ومحا ارجع اشتريه إني ماشفت شي يبهر فيه

سعرو: 119 ريال من الصيدليات الكبيره

Bioderma sensibio H2O

مزيل مكياج للبشرة الحساسه من بيوديرما, أول شي أنا ماأصدق إنو في مزيلات الميك أب اللي تشيل من أول مسحه أحس دا شي مالو وجود أصلن كلو يعتمد على كمية الميك أب اللي حاطتو زي حطيتي خفيف ينشال بسرعه حطيتي تقيل حتضري تمسحي كزا مره , مزيل بيوديرما من أجمل المزيلات اللي استعملتها أحس بأمان وأنا استعملو على وجهي وعلى جفوني وجوت عيني أبدن مايحرق ولا يسبب هيجان, أشوف إنو يشيل كويس بالرغم من إنو خفيف مره زي المويه ومو داخل في تركيبتو أي زيوت بس ما اعتمد عليه في إزالة الميك اب طبعن لازم بعدها غسول وكمان مقشر لو كنت حاطه ميك اب تقيل عشان أضمن إنو كمان المسام أتنضفت كويس, وأكيد حرجع أشتري منو

سعرو: ب 80 ريال متوفر في الصيدليات الكبيره

بس دا كان كل شي وان شاء الله تكونو استفدتو من التدوينة ..

Reviews About Tanning products I Used - ريفيوعن منتجات تان أستعملتها

السلام عليكم ورحمة الله وبركاته

موسم الصيف بدا وأغلب الناس تبا تتشمس عشان  كدا عملت البوست دا وهيا عن منتجات للتان منتجات مجربتهم طوال السنه اللي فاتت ودي السنه كمان

عشان تعملي تان مو شرط لازم بحر ولا ع المسبح وتجلسي تحت الشمس في منتجات تتسمى بالسيلف تان (self-tan) أو تان من غير شمس يعني ممكن تعمليه وإنتي في بيتك, (أنا شخصيا ما أحب تان الشمس لأنو يسمرني اكتر من إنو يعطيني لون تان فأفضل السيلف تان عليه)  والسيلف تان أنواع منها على كريم –موس(رغوة) – بخاخ – زيت – لوشن  .. وهادي المنتجات اللي جربتها وحتكلم عنها:-

Clarins Delicious Self Tanning Cream

دا سيلف تان على هيئة كريم من كلارنس, وهوا أول سيلف تان استعملو ومحا يكون الأخير إن شاء الله, الحلو فيه إنو يعطي لون تان مزبوط ومره مو اورنجي بزياده وكل ماحبيتي تغمقي تزيدي, غير كدا توزيعو مره سهل ويجلس ثابت 4 أيام لإسبوع ازا زدتني عليه .. طريقتو بعد التقشير تحطيه على كل جسمك و تتأكدي انو اتوزع كويس تجلسي بيه 10 دقايق لحد ماينشف وتلبسي ملابسك, اللون يبان بعد 4 إلى 6 ساعات ومره انصح بيه (مكتوب إنو ممكن ع الوجه والجسم بس ماعمري فكرت أحطو  على وجهي ) , النوع اللي عندي مافيه عامل حمايه من الشمس  اللي لونو أبيض فيه عامل حماية ومره يفيد ازا حطيتيه وتطلعي كتير في الشمس .. عيبو الوحيد ريحتو على حنه كدا بس تروح ماتمسك في الجسم وتبان

سعرو: 199 ريال, تلاقوه بوجوه - سيفورا – دبنهامز

( إن شاء الله حعمل بوست منفصل عن طريقة استعمال السيلف تان )

Yves Rocher Autobronzant Self- tanner

سيلف تان من ايف روشيه أقدر أقول إنو يعتبر بديل أرخص بس صراحة مهو أفضل من حق كلارنس, اللي عجبني فيه إنو بيشمر لمعه يعني فيعطي تحديد للساق واليدين (حلو لو كان عندك مناسبة ) وريحتو زي ريحة الفل تقريبا وتعتبر مقبولة اكتر من حق كلارنس بالنسبة ليا واللون يبان في ساعتين, بالنسبة للثبات مهو ثابت مره أقل مويه تجي عليه ينزل اللون وكمان إنو بيشمر حلو من ناحية منظرو ع الجسم ومو حلو من ناحية تانية إنو يضايقني إزا كنت جالسه في البيت احس في شي مومريح على جسمي وطول الوقت يلمع بس حلو للمناسبات إزا استعملو واجلس بيه وقت معين وأغسلو

سعرو: في حدود 70 ريال تقريبا من محلات ايف روشيه

Sally Hansen Airbrush Legs

بخاخات سالي هانسن للسيقان  ممتازة, هيا ماتعتبر من بخاخات التان بس تدرجات الألوان فيها أغلبها على تان وكمان الفينش حقها مره حلو وتغطيتها عاليه وضد المويه  وتجلس وقت طويل وممكن كمان تستعمل للجسم  تنفع للمناسبات الكبيره

سعرو: في حدود 75 ريال وستاندات سالي هانسن موجودة في فيسز – وايكونيك على ماعتقد كمان

Nivea Sun Carotene Sun Lotion

دا لوشن تشميس من نيفيا, جربتو كزا مره وماعجبني يسمر بزيادة و أحس يبقع يعني مايوحد لون التان مزبوط بعد التشميس وتكون في حتت في جسمي متفاوته في اللون و كرهني في التشميس الصراحه, بالنسبالي السيلف تان مناسبني اكتر وآمن أكتر في نفس الوقت

سعرو : في حدود 20 ريال من الصيدليات

آخر شي الترطيب, الترطيب مهم مهم مهم ازا عملتي تان لأنوح يساعد إنو التان يجلس فترة اطول ويوحد اللون تبع التان خصوصا إزا استعملتي سيلف تان من غير مرطب  حيسبب جفاف البشرة واللون حيبقع في الجسم وتطلع زي الخطوط وكمان يبهت فمره مهم الترطيب اقل شي ممكن في الليل قبل النوم ادهني مرطب على كل جسمك ونامي عشان تتجنبي مشاكل الجفاف والتبقع ويجلس اللون وقت أطول

Palmers Coca Butter

شخصيا بعد التان أفضل مرطب بزبدة الكاكاو واللي استعملو دايمن من بالمرز ترطيبو حلو وريحتو حلوه وومايمسح لون التان ولا يخففو بالعكس مرتاحه عليه .. في كمان زبدة الكاكاو من فازلين أو تبع بودي شوب لو مالقيتو بالمرز

سعرو : في حدود ال20 من السوبرماركت أو الصيدليات

دا كل شي لبوست اليوم حبايبي ازا عجبكم البوست أو في شي ماعجبكم اكتبولي ف الكومنتس وأنا أتقبل النقد بكل رحابة صدر أهم شي عندي إنكم تستفيدو من مواضيعي  ..  نشوفكم على خير في تدوينات تانيه إن شاء الله مع السلامة..

Diorskin Nude BB Cream review - ريفيو للبي بي كريم من ديور

السلام عليكم ورحمة الله وبركاته

أول حاجه حابه أعرفكم بنفسي انا اسمي (مريم) من مكة المكرمة, وغرضي من فتح المدونة إني اشارككم تجاربي وأفكاري وبكل شي يفيد البنات إن شاء الله, أول بوست حبيت يكون عن البي بي كريم من ديور

نبدأ بسم الله ..

إيش هوا البي بي كريم ؟ البي بي كريم (BB cream ) هوا كريم عناية يحمي البشرة وفي نفس الوقت ملون بحيث إنو يعطي تغطية طبيعية للوجه

ايش مميزاتو ؟ البي بي كريم تتوفر فيه مميزات حلوه منها:-

·       يوفر حماية للبشرة الوجه بعامل SPF

·       يرطب البشرة

·       خفيف ع البشرة ومناسب جدا للإستعمال اليومي

·       ممكن يستعمل كبرايمر قبل الميك اب

·      غالبا يناسب جميع انواع البشرة

 وكمان ليه عيوب منها :-

·       درجات اللون محدودة

·       تعطي تغطية خفيفة للبشرة اللي فيها عيوب

طبعن الريفيو حيكون عن ( (Diorskin nude BB cream وهادا هوا شكلو

 

الكريم جميل وحبيت فيها شغلات وشغله ماحبيتها, اللي حبيتو انو يعطي نضارة وقلو حلو للوجه وتغطيتو خفيفة كأني مني حاطه شي ودا اللي كنت ابغاه وكمان خفيف ع البشرة بحيث إنو ابدا مايكتمها ولا يسد المسام, وكمان فيه عامل حماية SPF 10  وكمان PA+ دا معناتو انو يوفر حماية أعلى للبشرة من اشعة الشمس والبلس ممكن تزيد ل 2-3 وكل مازادت كل ماكانت الحماية أعلى, تجي منها 3درجات أنا درجتي رقم 03  اللي هيا أغمق درجة عندهم وحسيتها أفتح مني بدرجة, الأندرتون جاي على بيتشي (مشمشي) مع نتفة وردي والدرجتين الأفتح أكيد بيكون الأندرتون وردي بس الحمدلله ماحسيت أنو بيقلب رمادي مع الوقت.

الحاجة الوحيدة اللي ماعجبني فيه إنو ازا جلست وقت طويل بيه يدهن وجهي بس بالنسبة ليا ماكانت مشكلة كبيرة لأنو بشيل معايا بودرة تطفي اللمعة

سعرو : 220 تقريبا .. ستاندات ديور موجوده في سيفورا -وجوه - دبنهامز

تقيمي له 8/10   ليش؟!

أول شي عشان سعرو غالي على بي بي كريم وتاني شي أنو بيدهن معا الوقت يعني اللي بشرتها مره دهنية ممكن محا يعجبها !!

إزا خلصت حرجع أشتريه؟ اممم لأ ماتوقع لأنو أحب أغير واجرب اشياء جديدة 

بس دا كان كل شي لبوست اليوم .. إن شاء الله يكون عجبكم ونشوفكم على خير في بوستات جايه 

مع السلامة حبايبي